Sveittur í sveitinni

Fór austur fyrir Kirkjubæjarklaustur í fundarferð með víndeildinni um helgina. Þetta var hin ágætasta ferð og fyrir utan það að funda stíft þá fórum við í veiði, skutum á gæsir, elduðum og átum góðan mat og drukkum eðalvín með. Alls ekki svo slæmt

Fórum í gær að ganga endanlega frá eldhúsinnréttingakaupum í Fríform og ef ég þekki mína rétt þá þarf líka að skipta um gólfefni í forstofunni, í eldhúsinu og í ganginum svona í leiðinni. Við fáum ekki innréttinguna fyrr en eftir ca 6 vikur þannig að þetta er ekki alveg að bresta á. Ég verð nú líka með einn besta iðnaðarmann Íslands með mér en Steini ætlar að hjálpa mér,,, eða réttara sagt ég honum. Fyrir utan að vera lærður smiður og stúdent þá er hann líka lærður rafvirki og hann flísalagði fyrir mig baðherbergið. Sem sagt líka múrari.

Er að fara í veiðitúr um helgina með góðum félögum í Norðlingafljótið og hlakka mikið til. Að öllum líkingum kemur Andri minn með og þá verður við feðgar loksins hlið við hlið í laxveiði og hver veit nema maríulaxinn komi á land hjá Andra. Viðkomum til með að gista á Sigmundarstöðum sem er óðalssetur sem Steini hefur aðgang að. Þar er allt til alls, meira að segja lítil innisundlaug þannig að það kemur ekki til með að væsa um okkur.

Lillinn minn er kominn með nafn og skal því ljóstrað upp hér, hann heitir:

Úlfar Freyr Óskarsson, svona í takt við bróðir sinn Jökul Frey. Hann er alltaf að verða fallegri og fallegri, veit ekki hvar þetta endar. 

Setti inn eina nýja mynd af mér ( hverjum öðrum ) en hún er í svarthvítu og var tekin í ferðalagi okkar um Snæfellsnesið í sumar. Vikilega falleg mynd sem Anna tók.