Nöldurseggir

Var að hlusta á Reykjavík síðdegis í gær þar sem menn voru að hringja inn og tjá sig um hin ýmsu mál. Og þvílíkt nöldur segi ég nú bara, það virðist alltaf vera hægt að að finna eitthvað neikvætt um öll mál.

T.d. orðuveitingarnar til handboltalandsliðsins. Nú eru menn að velta sér upp úr því að aðstoðarfólk landsliðsins hefðu líka átt að fá fálkaorðuna fyrir þeirra hlut í silfrinu. Er ekki allt í lagi spyr ég ? Ekki kannast ég við að aðstoðarfólk þeirra sem fengið hafa fálkaorðuna hingað til hafi líka fengið hana fyrir hjálpina. Ekki man ég eftir því að þegar Magga Pálma fékk orðuna að einhverjir aðrir sem staðið hafa henni við hlið gegnum súrt og sætt hafi fengið orðuna.  Einn sem hringdi inn klikkti út með því að halda því fram að hugsanlega hefður strákarnir okkar ekki náð svona langt ef sjúkranuddarinn hefði ekki nuddað þá svona vel. Kannski hefði Dorit átt að fá fálkaorðuna fyrir að nudda Loga svona vel !  

Ennfremur voru menn að hringja inn út af veiðiboðsferðum opinberra starfsmanna og fannst lítið mál þó þeir þiggðu eina og eina ferð. Það var enginn að velta fyrir sér af hverju var verið að bjóða þeim í slíkar ferðar. Ástæðan er einföld, þetta er fjárfesting sem ætlað er að skila arði. Með því að bjóða opinberum starfsmanni í veiðiferð eða annað þá ertu að reyna hafa áhrif á ákvörðunartöku hans. Það hlítur hver einasti maður að sjá. Það er ekki verið að borga mörg hundruð þúsund undir rassinn á þeim að því að þeir eru svo góðir strákar. Eða hvað ? Ég held að það liggi í hlutarins eðli að opinberir starfsmenn eigi ekki undir nokkrum kringumstæðum að þiggja slíkar mútur. Punktur basta.

Verum jákvæð, elskum alla.

Athugasemdir

[Rannveig Árna (IP-tala skráð) 29.8.2008 kl. 15:47]

Ef ég lendi inn á svona hlustendanöldurþátt í útvarpinu þá er ég sko fljót að skipta yfir á eitthvað annað. Það eyðir svo mikilli orku að hlusta á svona suðukollur.

Það liggur við að mér finnist skárra þegar þáttastjórnendur kreista upp úr sér hlátur í tíma og ótíma eða flissa eins og fermingarbörn.

Nei, má ég þá heldur biðja um hugljúfan söng í útvarpinu. Eða bara veðurfréttir - bara eitthvað sem gárar hugann ekki allt of mikið.