Biksvartur ömurlegur veruleikinn

Við okkur Íslendingum blasir hrollkaldur veruleikinn, sviðin jörð eftir nokkra gráðuga einstaklinga sem höfðu eingöngu Mammon að leiðarljósi og alla stjórnendur landsins sem höfðu heimsku strúta  að leiðarljósi. Og enginn ber ábyrgð, ekki einn maður hefur sagt af sér. Það er eins og þeir hafa kastað kjarnorkusprengju á landið okkar.

Þetta svo sem vitum við að hluta og ærin ástæða til að fyllast svartsýni.

Hins vegar er það bjartsýni sem við þurfum á að halda þessa dagana því það hjálpar alls ekki að sökkva sér í fenið.

Það er gríðarlega erfitt að vera bjartsýnn í dag vegna fjölmiðlanna því ekki er hægt að opna blað, hlusta á útvarp eða horfa á sjónvarp án þess að endalaus bölmóður fylli hlustirnar. Auðvitað er þetta veruleikinn, allir vita það, en fyrr má nú rota en dauðrota. Tökum dagsljós sem dæmi. Það er eins og Þórhallur og co leggi sig í líma við að fá á staðinn svartsýnustu einstaklinga sem til eru og er þeim ekkert heilagt í þeim efnum. Þau reyna alls staðar fyrir sér, hérlendis sem erlendis. Í hvert sinn sem maður horfir á dómsdagssvip og orð viðmælenda þeirra fýkur sá litli bjartsýnisvottur sem maður hafði byggt upp á haf út.

Hvernig getur það hjálpað Íslendingum að heyra endalaust frá ömurlegri framtíð þjóðarinnar ? Hvernig getur það hjálpað þeim sem geta ekki borgað reikningana sína, hafa ekki vinnu lengur o.s.frv. ?

Óréttætið í þjóðfélaginu er óendanlegt, það fer ekkert milli mála.

En, eina sem getur hjálpað þeim sem verst hafa orðið úti er bjartsýnin því með hana að vopni er í það minnsta auðveldara að lifa í gegnum þetta. Ef það er nú til örlítil vonarglæta í framtíðinni í hugum okkar held ég að það hljóti að hjálpa.

Það er allt betra en að feisa biksvartan ömurlegan veruleikann án vonar. Það er aðeins eitt sem getur hrakið myrkrið á brott og það er ljósið.

Ég er hættur að horfa á fréttir.

Athugasemdir

[Sigurveig Eysteins, 16.1.2009 kl. 01:21]

 Þegar ráðamenn sópa skítnum undir teppið og viðurkenna ekki að þar sé skítur,  þá er mjög erfitt fyrir okkur fólkið í landinu að horfa fram,  þeir virðast ekki skilja að svo við getum farið að byggja upp þá þurfa þeir að fara frá (helst úr landi) Sú umræða er farin í gang að við verðum að fara að horfa fram,  en ekki horfa aftur,  ég ætla rétt að vona að það gerist ekki,  fyrr en að búið verður að moka skítnum undan teppinu og koma þessu liði frá.  Við verðum bara að vera þolinmóð,  og ég er samfærð um að því fleiri sem mótmæla,  því fyrr gengur þetta upp og þeir fara frá.  þetta hefur nefnilega allt með egóið og hrokan að gera og að enda ferilinn með stæl hjá þessum ráðamönnum, þeir geta bara ekki hugsað sér að fara frá með skottið milli lappanna.