Krókurinn

Er staddur á Króknum með góðri vinkonu minni henni Ásthildi í góðu yfirlæti. Örlítil snjókoma og kalt í veðri og við erum á leið norður.

Chiao for now.

Sýndarveruleiki

Það er ótrúegt að maður skuli lesa um slíkar barsmíðar í skólum landsins nánast í hverri viku. En við hverju má svo sem búast þegar foreldrar leyfa börnum sínum að alast upp við ótrúlega ofbeldisfulla tölvuleiki sem gera út á miskunnarlausar barsmíðar og dráp ? Hugsanlega þurfa foreldrar aðeins að fara skoða sinn eigin rann því það er ekki hægt að kenna skólunum um þetta endalaust. Það má ekki kaupa knallettu byssu handa börnunum en tölvuleiki, það er allt annar handleggur.

Ef eitthvað ætti að banna í þessu blessaða bann þjóðfélagi okkar þá eru það slíkir leikir. Getur einhver bent á eitthvað gott eða jákvætt við slíka leiki ?

Ráðist á nemanda í Sandgerðisskóla

Ljósgeislar allt í kring

Úti skín sólin glatt og kastar ljósgeislum sínum yfir landsmenn. Ég er búinn að fá 2 ljósgeisla á stuttum tíma, hana Heklu og bíb Andradóttur ( veit nafnið :) ) Kíkti á nýju lilluna bæði á laugardag og sunnudag, alger engill.  Ætla svo að kíkja á númer 2 og 3 á eftir því ég hef ekki séð þau í nokkra daga. Stal myndum frá fésinu hennar Erlu og setti hér inn.

Annars var helgin hektik. Próf fyrir hádegi á laugardag og svo undirbúningur fyrir Vox Feminae árshátíð þar sem við Anna vorum með leikrit í gangi. Ég skrifaði handritið af því í síðustu viku með próflestrinum. Uppskárum mikinn hlátur og ég held að þetta hafi slegið í gegn. Svo var dansað fram eftir og við skemmtum okkur konunglega.

Tókum því bara rólega í gær, hvort sem fólk trúir því eður ei. Náðum í frábæra mynd fyrir kvöldið, Farinelli og nutum þess listaverks.

Svo er það Sauðárkrókur og Akureyri næstu helgi ....Ég hlakka rosalega til að keyra þangað í hálku og hríðarbil með aðstoðar ökumanninn mér við hlið. Ég geri fastlega ráð fyrir að heyra ekkert þegar komið er á leiðarenda og vera verulega lurkum laminn hægra megin á líkamanum. ( ´öskur og óp..það er bíl !, það er bíll framundan !!..arg .. ) eins og það sé eitthvað óvenjulegt. Hugsanlega læði ég eyrnatöppum í eyrun þegar Anna sér ekki til en við sjáum hvað setur.

 

Gott símtal um hánótt !

Já, svei mér þá, við fengum frábært símtal kl. 4 í nótt. Vorum ekki einu sinni sofandi þar sem mikill spenningur hafði gripið um sig. Það er nú ekki á hverjum degi sem við erum með opinn síma á náttborðinu.

Sum sagt, Andri Már hringdi til að tilkynna okkur að lítil, mjög lítil telpa hafði komið í heiminn tuttugu mínútum fyrr. 11 merkur og 48 cm með að mér sýndist rautt hár og andlitið hennar mömmu sinnar.

Yndisleg lítil dúlla

Góð helgi

Að baki er góð og tiltölulega róleg helgi. Skólinn náttúrulega á laugardaginn, var með skil á 2 verkefnum og smá fyrirlestur.

Afar rólegt laugardagskvöld og á sunnudag komu góðir gestir í heimsókn. Sigga H kom með góða gesti gesti frá Englandi, Möggu systur, Dennis manninn hennar, Sammý dóttir þeirra og James manninn hennar. Anna snaraði heimabökuðu bananabrauði, súkkulaðitertu og vöfflum á borðið þeim til mikillar ánægju. Og mér að sjálfsögðu.

Síðan var ég með góóóóðan kvöldmat handa elskunni minni enda konudagurinn. Foi gras í forrétt með reciotto sætvíni og grillaður humar með Chassagne Montracet hvítvíni frá Olivier Lefflaive. Þetta var algerlega geðveikt saman.

Svo róleg kósíheit um kvöldið ...

Fúll á móti

Það er alveg ótrúlegt að sjá breytinguna á þingmönnum vinstri Grænna um þessar mundir en þeir hafa breyst úr Grýlu og í Þyrnirósu. 

Allt þetta fólk sem var einatt vælandi og á móti öllum breytingum hafa breytt um ham. Steingrímur, Ögmundur og Kolbrún eru nú að gera nákvæmlega það sem aðrir voru að gera áður og þau mótmæltu hástöfum.

Hvar er nú sá Steingrímur sem ætlaði að skila Alþjóða láninu og frysta allar eigur auðmanna ?

Hvar er sá Ögmundur sem varð eins og broddgöltur í hvert sinn sem minnst var á niðurskurð í heilbrigðiskerfinu.

Hvar er sú Kolbrún sem sífellt sífraði og kvartaði um allt og alla ?

Getur verið að þau hafi sofnað Þyrnirósa svefninum langa ?

Það er svo óendanlega auðvelt að vera fúll á móti og ég veit að þetta sama fólk veltir nú fyrir sér af hverju í ósköpunum þau eru komin í þessa stöðu.

Eurovision

Það verður villt júrívíon partí heima hjá Írisi minni á laugardagskvöldið og þar verður öll mín litla fjölskylda: Ég, Anna Birgitta, Andri Már, Erla (og litla bumbulínan) ,Óskar, Jökull Freyr, Úlfar, Hekla prinsessa og Íris. Sem sagt, vilt geim.

Við ætlum að fá okkur raklet eldaðan mat, kjósa uppáhaldslagið okkar og skella okkur kannski í fimbulfamb. Verð með nokkra 5 ltr Heineken kúta með mér ....

Og lagið sem vann ...ja það er úr vöndu að ráða. Mér finnst lagið sem Jóhanna syngur öruggt og fallegt og hún sjálf náttúrulega alger prinsessa. Hins vegar held ég að Elektra fari áfram og finnst það bara í fínu lagi. Stuð lag með öðruvísi hljómsveit (kvennahljómsveit þar sem allir meðlimirnir eru öðruvísi en hinir ) svona ekta júróvisíon dæmi.

Ég ætla að vona að æsingurinn verði ekki of mikill því þá er hætta á að það þurfi að skutla Erlu upp á fæðingardeild því hún er sett á laugardagskvöldið

Vetrarhátíð

Ómægod, nú er Vetrarhátíðin að ganga í garð í Reykjavík og hvílík hátíð ! Það er svo þéttskipuð dagskrá alla dagana að mjög auðvelt er að fá magasár af valkvíða.

Því er hins vegar ekki til að dreifa hjá mér því ég verð í skólanum mest allan daginn á morgun og þarf eitthvað að læra á sunnudeginum. Er með 2 hópverkefni í gangi ...

Það mun samt sem áður ekki aftra mér frá því að sækja eitthvað af þessu svona inn á milli því ég elska list og listamenn. Maður hefur alltaf tíma eða eins og gamalt kínverskt máltæki segir: Ef þú vilt fá eitthvað gert biddu þá einhvern sem hefur nóg að gera.

Ég skora á alla þarna úti að notfæra sér þessa dásamlegu hátíð og næra hugann.

Mannauður

Mjög hefur mörgum verið tíðrætt um þann mannauð sem Íslenska þjóðin geymir og hver mannauðar stjórnandinn á fætur öðrum verið útskrifaður úr Háskólum landsins. Í hverju fyrirtæki er mannauður settur á oddinn, flaggað á góðum stundum og oftar en ekki sett fram sem hjarta fyrirtækisins.

Samt finnst mér eins og enginn viti hvað þetta " mannauður " er enda einhvern veginn lítið farið því því undanfarið þegar starfsmannastefna flestra fyrirtækja taka aðallega mið af uppsögnum, launaskerðingum o.s.frv.

Nú gengur stór hluti þessa mannauðs þjóðarinnar um götur án vinnu og ég ætla bara hreint að vona að ekki fari fyrir þessum mannauð eins og öðrum auð íslensku þjóðarinnar undanfarið.

Kannski spurning um að fara kalla þetta réttum nöfnum og reyna gera eins vel og hægt er fyrir íslenskt vinnuafl, íslenskt vinnufólk því á endanum er þetta allt saman venjulegt fólk en ekki mannauður.

 

Listasmiðjan Vox Feminae

Þá er vikulangri hátíð kvennakórsins Vox Feminae í Norræna Húsinu lokið. Og þvílík hátíð !

Alla vikuna hafa þær boðið upp á listrænar uppákomur með leikhúsi, leik og tónlist. Á hverjum degi var eitthvað nýtt og ferskt að gerast og á tímabili voru heilu búslóðaflutningarnir til og frá Norræna Húsinu til að mynda réttu stemninguna. Allt kom þetta frá hugmyndasmiðjunni Margréti Pálmadóttir og í sameiningu bjuggu þær til " kreppuhvarf " þar sem fólk gat notið þess að hverfa frá kreppunni í smá tíma. Vox Feminae er ekki " bara " kvennakór heldur heil listasmiðja sem framreiðir fallegan söng ofan í okkur á frumlegan hátt.

Þær sannarlega buðu okkur upp á þetta því allt var þetta frítt.

Þetta eru frábærar konur !